O Campus Auga vén de editar Plan de Formación de Innovación 2024, un libro que ofrece un enfoque integral, desde a teoría á práctica, sobre o emprendemento empresarial, adaptado de xeito especial ás necesidades do alumnado universitario. Ademais, quere ser un manual que serva como guía completa para calquera persoa que se inicie no mundo empresarial.
A publicación naceu relacionada coas Xornadas formación para a innovación. O emprendemento do alumnado universitario, celebradas a finais de febreiro na Facultade de Ciencias Empresariais e Turismo do campus de Ourense. A actividade contou co apoio do Campus Auga.
Ao igual que as xornadas, o libro está coordinado por Javier Rodeiro e María Montserrat Cruz e realizado por profesorado de Ciencias Empresariais e Turismo e Enxeñaría Informática.Son autores dos seu contidos o profesorado da Facultade de Ciencias Empresariais e Turismo Noelia Araújo, Diego Rodríguez-Toubes, Nuria Rodríguez, Ernesto López-Valeiras, Juan Manuel de los Ríos e a xa citada María Montserrat Cruz. “Nun contexto onde a transformación e o avance tecnolóxico son constantes, resulta fundamental xerar propostas comerciais novas, que poden adaptarse no menor tempo posible ás evolutivas esixencias do mercado. O propósito deste manual consiste en proporcionar as ferramentas e os coñecementos requiridos para moverse nesta complicada contorna empresarial”, sinalan desde a súa coordinación. O libro, engaden, “quere presentarse como un referente para o alumnado universitario que desexe obter unha formación extraacadémica suplementaria aos seus coñecementos e habilidades curriculares derivados dos diferentes estudos universitarios, de modo que se constitúa nunha ferramenta práctica, innovadora e potenciadora de ideas que poidan ter un percorrido incremental no tempo”.
Da idea de negocio aos trámites de creación
O manual arranca abordando a idea de negocio, cubrindo aspectos básicos, como a xeración de ideas a través da exploración da contorna, a creatividade empresarial e diferentes técnicas de ideación. Neste sentido, propoñen ao público lector comezar o seu estudo coa análise dun diagnóstico inicial, avaliando tanto o contexto xeral como o específico, e a análise interna, o que lles permitirá obter unha visión completa da súa proposta. A segunda sección do manual está enfocada na idea de modelos de negocio e nela os conceptos como formación, organización e xeración de valor son abordados polos autores, presentando o concepto de Lean Startup. “Mediante Lean Canvas, os emprendedores poderán organizar os seus modelos de maneira eficaz e eficiente, o que lles axudará a detectar oportunidades e crear propostas de valor atractivas”, explícase na publicación.
Na terceira parte, o libro achega o público a conceptos sobre a promoción e publicidade, explicando os principios elementais e complexos da mercadotecnia actual, pondo de relevo a necesidade de analizar o mercado, as tácticas en liña e establecer unha identidade de marca forte. Xa a cuarta parte do libro céntrase na análise de contabilidade e finanzas, “elementos fundamentais que permiten aos emprendedores xestionar os seus recursos de maneira efectiva e avaliar o rendemento das súas iniciativas”. Preséntanse conceptos chave e boas prácticas para asegurar a sostenibilidade financeira do negocio. Finalmente, inclúese un anexo que describe as formas xurídicas e os trámites necesarios para a creación dunha empresa, proporcionando unha guía práctica para aqueles e aquelas que se embarcan no emprendemento.
Venture Lab, iniciativa promovida polo Campus Auga, é un espazo de formación e de encontro entre o estudantado, o profesorado e as empresas buscando sinerxías e fomentando a relación entre eles. Nas súas páxinas podes descargar este Plan de Formación de Innovación 2024.