A presenza de residuos de funxicidas no medio fermentativo pode alterar o aroma do viño

Destaca a importancia de respectar as doses e prazos de seguridade na aplicación destes produtos

Investigadoras do Grupo de Nutrición e Bromatoloxía durante o traballo experimental da tese

“A presenza de residuos de funxicidas no medio fermentativo pode ocasionar cambios a nivel xénico nos lévedos, o que pode alterar o perfil aromático dos viños. Polo tanto, é moi importante respectar as doses de aplicación e os prazos de seguridade recomendados polos fabricantes destes produtos, non só para garantir a obtención dun produto inocuo para o consumidor senón tamén para maximizar a súa calidade organoléptica”. Esta é a principal conclusión da tese de doutoramento da investigadora da Universidade de Vigo Thais Sieiro na que abordou o impacto dalgúns dos principais funxicidas empregados no sector.

A tese, dirixida por Raquel Rial e Carmen González, foi presentada na Facultade de Ciencias do campus de Ourense baixo o título Impacto dos funxicidas sobre o metabolismo dos lévedos vínicos e a súa implicación na biosíntese de compostos volátiles responsables do aroma. A idea de afondar neste eido de estudo, indica a investigadora do Grupo de Nutrición e Bromatoloxía, xurdiu tendo en conta a relevancia e tradición do sector en Galicia, o uso xeneralizado de funxicidas nos viñedos e o feito de que “o viño é un alimento que se consume basicamente por pracer e son as súas características organolépticas, entre elas o aroma, as que xogan un papel decisivo á hora de que o consumidor seleccione un ou outro produto no mercado”.

Ler a noticia completa no DUVI